Monday, July 5, 2010

குடும்பப் பெண்ணின் உள்ளத்திலே...

ஆண்:    குடும்பப் பெண்ணின் உள்ளத்திலே
                 குடியிருக்க நான் வர வேண்டும்
                 குடியிருக்க நான் வருவதென்றால்
                 வாடகை என்ன தரவேண்டும்?

பெண்:    குடும்பப் பெண்ணின் கூந்தலுக்கு
                 மல்லிகை வாங்கித் தரவேண்டும் 
                 மல்லிகைப் பூவை வாங்கிக்கொண்டு
                 மதுவின் வாசமின்றி வரவேண்டும் 

ஆண்:    கைகள் கருவியாய், வியர்வை அருவியாய்
                உயிரும் கரைய நான் உழைத்தேன்
                உடல் சோர்வு போக்க, மனம் தீர்வு கேட்க
                பணம் தீர்ந்து போக நான் குடித்தேன்

பெண்:  நாம் பள்ளி கொள்ள, உன்னை அள்ளிச் செல்ல
              தினம் தெருவில் தேடியே திரிந்தேன்
              உன் குடலைக் கெடுக்கும் குடுவைகள்
              வேண்டாம் குடிலைத் தேடி நீ வருவாய்

ஆண்: குடும்பப் பெண்ணின் உள்ளத்திலே
             குடியிருக்க நான் வர வேண்டும்
             குடியிருக்க நான் வருவதென்றால்
             வாடகை என்ன தரவேண்டும்?


பெண்: உழைப்பால் உயர்ந்த கைகளிலே
              ஊதியப் பணத்துடன் வர வேண்டும்
              நான்கு கால்களில் நடக்காமல்
              நிமிர்ந்து நடந்து நீ வர வேண்டும்

ஆண்: மாலை என்றொரு வேளை வந்ததும் 
            வேலை முடிந்து நான் வருவேன் 
            விழி மறைந்து போக வழி மறந்து போக
             பழி நண்பன் மீது தான் தருவேன்   
             நான் மில்லி கேட்க அவன் லிட்டர் கேட்க
             யார் சொல்லியும் கேட்காமல் குடிப்போம் 

பெண்: அந்தக் கெடுவார் கூட்டத்தில் கூடவேண்டாம்
              குடும்பம் தேடி நீ வருவாய்

ஆண்: குடும்பப் பெண்ணின் உள்ளத்திலே
             குடியிருக்க நான் வர வேண்டும்
             குடியிருக்க நான் வருவதென்றால்
             வாடகை என்ன தரவேண்டும்?

பெண்: குடும்பப் பெண்ணுடன் காத்திருக்கும்
             குழந்தைக்கு முத்தம் தர வேண்டும்
             குழந்தையின் சிரிப்பைப் பார்ப்பதற்கு
             குடியை முழுதுமாய் விட வேண்டும்

5 comments:

kggouthaman said...

நல்லா கீது.

ஸ்ரீராம். said...

சுமாரான பாடலை சுத்தமான நோக்கத்திற்கு உபயோகப் படுத்தியிருக்கிறீர்கள்... நல்ல முயற்சி. பாராட்டுக்கள்.
தை, காந்தி கவிதைகளும் அபாரம்.

மோ.சி. பாலன் said...

கௌதமன், ஸ்ரீராம் - நன்றி

அப்பாதுரை said...

அப்ப குடிக்கிறது நல்லதில்லேன்றீங்க.. கள்ளூறும் இதழ்னு பாடினா பரவாயில்லையா அதுவும் வேணாங்குறாளா பெண்? சுவையான புரட்டல்.

மோ.சி. பாலன் said...

அப்பாதுரை அவர்களே,
இதழில் ஊற்றும் கள் தவறு. கள்ளூறும் இதழ் தவறில்லை !!
.... அப்பா சமாளித்து விட்டேன் !!

எனது முந்தைய பதிவுகளையும் படித்து பின்னூட்டம் இட்டமைக்கு நன்றிகள் பல.