Wednesday, April 27, 2016

ஓட்டுக்காகக் காசு வாங்கக் கூசுதையா உடம்பு

ஓட்டுக்காகக் காசு வாங்கக் கூசுதையா உடம்பு
விலகிடாத ஊழல் நம்ம நாட்டைப் பிடிச்ச உடும்பு

ஓட்டுக்குக்காக நோட்டை வாங்கித்
தோட்டம் போட முடியுமா? அந்த
அற்பக்காசில் அஞ்சு வருஷம்
அடுப்பெரிக்க முடியுமா?

ஓட்டுக்காசில் நோட்டு வாங்கிப்
புள்ளைங்களும் படிக்குமா? அந்தப்
பாவப் பணத்தில் புதுத்துணியும்
வாங்கி உடுத்தத் தோணுமா?

சாமிக்குமே காணிக்கையை
சேமிச்சிதான் கொட்டுறோம்
நாட்டுக்காக வரிப்பணத்தை
உழைச்சிதானே கட்டுறோம்?

இது அதுன்னு இலவசங்கள்
எதுக்கு ஐயா நமக்கு?
இனிப்பில் மறைஞ்ச துளிவிஷமாய்
நெனச்சி அதை ஒதுக்கு

நல்ல வீட்டை நாளும் நாளும்
செல்லரிக்க விடுவமா? ஐயா
நம்ம தமிழ்நாட்டை நாமும்
சீரழிய விடுவமா?

ஓட்டுக்காகக் காசு வாங்கக் கூசுதையா உடம்பு
நியாயத்துக்கு வாக்களிச்சா நிமிரும் முதுகு எலும்பு

-பாலா சிவசங்கரன்