கடலை முத்து

கடல் முத்தா என்னயுந்தான்
பொத்திப் பெத்து வளர்த்தவளே
கடலை முத்தா நானும் இப்போ
கசங்கிப் போயி நிக்குறேனே

ஒடச்ச தோலா உன்னையுந்தான்
ஓரத்துல தள்ளிவிட்டு
எண்ணெயைப் போல்
என்னைப் பிழிஞ்சி
யார் யார்க்கோ வார்த்துவிட்டு
புண்ணாக்கா நிக்குறேனே

பெத்த வயித்தை ஒருநாளும்
பசியாத்தி விட்டதில்ல
பால் குடிச்ச மார்மேல
சேலை வாங்கிப் போர்த்தவில்ல
சோறு போட்ட கையக் கொஞ்சம்
சுளுக்கெடுத்தும் விட்டதில்ல

சாரயத்தக் குடிச்சிப்புட்டு
தோராயமா வீடு வந்தா
செருப்பெடுத்து அடிக்காம
சோறாக்கிப் போடுறியே