HAPPY BIRTHDAY RAJA SIR

(முத்தைத்தரு - திருப்புகழ் பாடல் மெட்டில் )
 
வித்தை பல கற்றுக் கலைமகள் மெச்சத்தகு புத்திக்கு அதிபதி
தித்தித்திடும் மெட்டுத் தரவல்ல இசைஞானி
எட்டுத் திசை பட்டத் தமிழரின் இட்டத்தினில் நித்தம் நிலவிடும் 
மட்டத்துயர் தட்டில் திரவியம் இசைஞானி
 
பட்டிக்கொரு கட்டிக்கரும்பென சிட்டிக்கொரு சீனிக்கழியென
எட்டுத்திசை எங்கும் இனித்திடும் இசைஞானி
பட்டப் பகல் முட்டும் குளிர்ந்திட கொட்டும் பனி மெட்டில் மகிழ்ந்திட
எட்டும் இருள் மட்டும் துணைவரும் இசைஞானி
 
கெட்டும் மனம் முற்றும் நலம்பெற ஒட்டும் உயிர் ஊனில் நிலைபெற 
கொட்டும் உயிர் மெட்டில் குருதியில் இசைஞானி 
பட்டத் துயர் எட்டிச் சிதறிட பக்தர்க்கருள் கொட்டித் தருகிற
கிட்டத்தினில் கிட்டும் இறைவனும் இசைஞானி 
 
இசைஞானிக்கு இனிய பிறந்த நாள் நல்வாழ்த்துகள்
 
பாலா சிவசங்கரன்
02 ஜூன் 2020
=====-----=====-----=====

மங்கையர் தின நல்வாழ்த்துக்கள்

"தற்காத்துத் தற்கொண்டாற் பேணித் தகைசான்ற
சொற்காத்துச் சோர்விலாள் பெண்"
வள்ளுவன் அன்று சொன்னது இன்றைக்கும் எவ்வளவு பொருந்துகிறது பாருங்கள்!

"தன்னைக் காத்துக்கொண்டு தான் அன்புகொண்ட அனைவரையும் காத்து, தனக்கு வாய்த்த நற்பெயரைக்காத்து(அ)சொன்ன சொல்லைக் காத்து சோர்வில்லாதவளே பெண்"
பழமை பண்பாட்டுப் போர்வைகளை நீக்கி இக்குறளின் பொருள் புரிந்துகொள்ளவேண்டும்.

குறிப்பாய் இக்குறளின் முதலிலும் கடைசியிலும் உள்ள கருத்துகளை இந்த மங்கையர்தினத்தில் நமது தோழியருக்கு நான் வலியுறுத்த விரும்புகிறேன்.

*** தன்னைக் காத்தல் என்பது மிகவும் அவசியம். தியாகம் என்ற பெயரில் தம்மை வருத்திக்கொள்ளாமல் தங்களின் உடல் நலம், உள்ள நலம், பணி நலம், பண நலம் அனைத்திலும் பெண்கள் அக்கறை செலுத்த வேண்டும் ***

*** சோர்வில்லாதிருத்தல் என்று வள்ளுவன் சொல்வது உடற்சோர்வு கொள்ளாமல் உழைத்துக்கொட்டவேண்டும் என்பதல்ல. மகளிர் மனச்சோர்வு கொள்ளாமல் மகிழ்வுடன் இருக்கவேண்டும் என்பதே அவர் சொல்வது ***

எத்துயர் வரினும் எடுத்தெறிந்துவிட்டு இன்று பூத்த பூவென என்றும் புத்துணர்வுடன் பூவுலகில் நம் தோழியர் வாழ்கென வாழ்த்துகிறேன்.

தீபாவளி நல்வாழ்த்துகள்

அதிரசம்போல் மின்னிடுமே
எண்ணெய் தேய்த்த மேனி
அடுக்கடுக்காய் முறுக்கு தட்டை
அடித்து நொறுக்கத் தீனி
தீபாவளி மருந்து சாப்பிட்டும்
விருந்து சாப்பிடலாம்
விருந்து சாப்பிட்டும்
மருந்து சாப்பிடலாம்
வெடிக்கின்ற வெடிகள்
வெற்றி முரசு கொட்டும்
வெடிக்காத வெற்று வேட்டும்
தோல்வி பழக வைக்கும்
மத்தாப்போ கம்பியோ
எதையாவது பற்றவைப்பதென்பது
யாருக்குத்தான் பிடிக்காது?!
ஏற்றிவைத்த தீபம் நமது
இல்லம் கோயிலாக்கும்
ஏற்றிவைத்த புன்னகையும்
இதழ்களை எழிலாக்கும்
புத்தாடை புதுப் படம்
குறைவிலாக் கொண்டாட்டம்
நரகாசுரன் என்பதெல்லாம்
நமுத்துப்போன காரணம்
பண்டிகைகள் வாழ்வதற்கு
கொண்டாட்டமே காரணம்
கொண்டாட்டமாய் வாழ்வதற்கு
பண்டிகைகளே காரணம்!

அனைவருக்கும் தீபாவளி நல்வாழ்த்துகள்
அன்புடன் பாலா சிவசங்கரன்

ஹோலி

நீ கண்ணுக்கிட்ட மையொன்றே போதுமடி
நான் கருப்பு வெள்ளையில்
ஹோலிப் பண்டிகை கொண்டாட....
இருந்தாலும்......
"இந்தா வைத்துக்கொள் வண்ணங்கள்"
என்று தானோ
வானவில் காட்டினாய்
தலைதுவட்டி நீ உதறும்
வாசம் சுமந்த நீர்த்துளிகளில்?

திருமண நிச்சயதார்த்தம் - வாழ்த்து

அவள் அவனவள் என்று ஆனாள்

ஆனால் ஆணால் கணவனாவது

கனவினில் மட்டுமே இன்னும் சிலநாள்

இன்று திருமணம் திண்ணமானது

வருமே திருமண தினமானது

அதன் பின் இணைமானது இனமாகுமே

உன் இனமானது இன்னும் ஆகுமே!

வாழ்க வளர்க!     பி.கு : நண்பர் ஒருவரின் மணஉறுதி விழாவுக்கு எழுதிய குறுமடல்

திருமண நாள்

எனது திருமண நாளன்று (மார்ச் 8) எழுதியது:
-----------------------------------------------------------------

எங்கிருந்தோ வந்தாள்
இனி உன் பெண்சாதி நான் என்றாள்
இங்கிவளை யான் பெறவே
என்ன தவம் செய்து விட்டேன்..

இன்றுடன் ஆண்டுகள் ஆயின பதினைந்து

நன்றி சொல்ல நூறுண்டு
இன்று சொல்வேன் ஒன்று
நன்றி.
என் சிறு குறைகள் திருத்தி
என் பெருங்குறைகள் பொறுப்பதற்கு. 

தீபாவளி நல்வாழ்த்துக்கள்

எஞ்சியிருந்த எம் மரத்துக் காகங்கள்
அஞ்சியிருந்து எம்மரத்தில் உறங்கியனவோ...
வாலாட்டும் தெரு நாய்கள்
காலிடுக்கில் வாலொடுக்கி
எங்கோடி ஒளிந்தனவோ...
பட்டாசுகள் வெடித்து
மனிதர் நாம் மகிழ்கையில்..

வெளிப்புகை ஒவ்வாமல்
வீட்டில் அடங்கிய கொசுக்களுடன்
தீபாவளி கொண்டாடி மகிழ்வோமாக.

அனைவருக்கும் தீபாவளி நல்வாழ்த்துக்கள்.

உழைப்பாளர் தின வாழ்த்துக்கள்

எட்டாத உயரத்தில்

   எட்டான கால் கொண்டு

       பட்டான நூல் கொண்டு

           கட்டிய வலை வீட்டில் விழும்

              விட்டில் உண்டு மகிழும்

                 எட்டுக்கால் பூச்சி நான்

கட்டாந் தரையிலும் 

   நெட்டான சுவரிலும்

       கட்டாக நடந்து 

           கிட்டாமல் கிட்டியதை  

               கட்டாகக் கட்டி 

                  பொட்டாகச் சுமந்து

                      பெட்டியில் வைத்துண்ணும்

                         குட்டிக்கால் எறும்பு நான்

தட்டான கணினியை

   பட் பட் பட்டென்று

      தட்டித் தட்டித் தட்டி

         நெட்டெல்லாம் தேடி  

            நைட்டெல்லாம் கண் விழித்து

                கட்டுக் கட்டாய்  

                   நோட்டு எண்ணி

                       தட்டுத் தட்டாய்த் தின்று

செரிமானம் இல்லையென்றோ

    சரி மனம் இல்லையென்றோ

        மருத்துவரை நாடாமல்

           உண்ண உழைக்காமல் எம்போல்

              உழைத்து உண்க வென்று

                 உழைப்பாளர் தினத்தன்று 

                    வாழ்த்துரை கூறுகின்றோம்.

                         வாழ்க வளமுடன்.

                              

   

     

கார்த்திகை தீபம்

திருவாய் திறந்து மணிகள் ஒலிக்கத்
திருநாள் அறிந்து திசைகள் சொலிக்கத்
திருமகள் சூடும் மணியாகும் - தீபத்
திருவிழா சூழும் சுடர் 

அருவாய்த் தகிக்கும் தணலில் மலர்ந்து
உருவாய்த் திகைக்கும் ஒளியில் மிளிர்ந்து
தருவாய்த் தழைத்துத் தரணி நிறைக்கும்
இருளில் அகலால் பகல்

கருணை மழையைப் பொழிந்திட வானில்
வருணன் கடலை அழைத்திடத் தேரில்
அருணன் வரவழி காட்டும் விளக்கே
அருணை மலையில் மலர் 

அனைவருக்கும் கார்த்திகை தீபத் திருநாள் வாழ்த்துக்கள்  

பேரா நீ நல்ல பேரா எடுடா

பேரா நீ நல்ல பேரா எடுடா

என் அப்பனுக்கும் உன் அப்பனுக்கும்
இடையேன் சொல்வதைக் கேளடா
உன் விழைவிற்கும் உன் உயர்வுக்கும்
இடையில் வருவது வியர்வையடா
உன் உறுதிக்கும் உன் உயர்வுக்கும்
தடையாய் அயர்வதைத் தள்ளடா ... ( பேரா...)

என் சோற்றிலும் உன் சோற்றிலும்
விழாது பிழைத்த நெல்லடா
மண் சேற்றிலும் பின் நாற்றிலும்
கெடாது தழைத்த நெல்லடா
சிறிது சோறுமாய் நிறைய நெல்லுமாய்
நீ வாழும் நாட்களை மாற்றடா ... ( பேரா...)
____________________________________

தாமதமான மழலையர் தின வாழ்த்துக்கள்.
என் தந்தை என் மகனுக்குச் சொல்வதாய் நான் அமைத்த பாடல்
படத்தில்: என் தந்தையும் என் மகனும்



தீபாவளி வாழ்த்துக்கள்

இளையராஜா விருது பெற்றதற்கு வாழ்த்து

பழசிராஜாவுக்கு விருது பெற்றாலும் ராஜா என்றுமே இளையராஜா தான். அவருக்கு வாழ்த்து வெண்பா இதோ:

அசைபோடும் உள்ளம் மடைவிட்ட வெள்ளம்
திசையெட்டும் தன்மெட்டில் எட்டும் - இறைவன்
இசைத்தட்டில் வைத்த இனிப்புகள் என்றும்
இசைந்திட்டோர் நெஞ்சில் நிலை

நிழல்கள் படப்பாடல் தழுவி வேறொரு வாழ்த்து இதோ:

மடை திறந்து தாவும் நதியலைதான்
மனம் திறந்து கூவும் சிறுகுயில் தான்
இசைஞானி - அவர் பாடல்கள் ஆயிரம்
இசைத்தது நிலைத்தது

ராகம் பிறந்தது ரசிகர் கண் பனித்தது
ராஜா பிறந்ததால் நல்லிசை பிறந்தது
புது ராகம் படைப்பதாலே அவர் தான் இறைவனே
இசைக்கென இசைகின்ற ரசிகர்கள்  ராஜ்ஜியம்
அவர்க்கே தான் !

ரமலான் வாழ்த்துக்கள்

இளம்பிறையாய்த்  தோன்றும்
இறையருள்
முழு மதியாய் வளர்ந்தோங்க
ரமலான் திருநாள்
நல்வாழ்த்துக்கள்